Landslagið í Suðuroy er sermerkt av djúpum firðum. Umframt framúrskarandi landslagið kann oyggin bjóða eitt breitt úrval av áhugaverdum tilboðum, frá søguríku Sandvík í norði til náttúruvøkru Sumba í Sunnan. Størstu býirnir, Tvøroyri og Vágur, liggja við vakrar firðir umgirdir av fjøllum.

Vegir eru millum allar bygdir og býir, og ganga hesir gjøgnum bergtakandi náttúrufyribrigdir. Norðastu bygdirnar, Hvalba og Sandvík, hava samband við hvørja aðra gjøgnum eitt av landsins elstu bergholum. Úr hesum bygdum er vakurt útsýni til Føroya einastu mannleysu oyggj, Lítla Dímun.

Hvalba er einasta pláss, har enn verður arbeitt "á kolinum".

Hov telist millum elstu bygdir í Suðuroy. Og var Hov høvuðssæti hjá Havgrími í víkingatíðini, sum eisini er grivin í Hovi.

Porkeri er kend fyri sína sermerktu og vøkru trækirkju frá 1847.

Sunnast á oynni liggur Sumba, ið fostrað hevur eitt av Føroya mætastu skaldum, Poul F. Joensen.

Á veg til og frá Sumba, eftir gamla fjallavegnum er  Beinisvørð, Føroya næsthægsta fuglabergið, 469 m høgt, sum alkent er fyri sín vakurleika.

Tá tygum koma til Suðuroyar, eru tygum vælkomin at vitja tær báðar kunningarstovurnar í oynni. Loyvið okum til at viðvirka at gera vitjan tygara ógloymandi. Á kunningarstovunum finna tygum mong góð tilboð um túrar, og vit eru fús at vegleiða og veita eina hjálpandi hond. Báðar Kunningarstovurnar eru í somu húsum sum býráðsskrivstovurnar eru.

Á síðuni Kunning finnur tú upplýsingar um millum annað matstovur, handlar, útferðir, gongutúrar, frítíðarítriv og vitjunarverd støð sum t.d. kirkjur, náttúra, listasøvn, bygdasøvn og fornminni.

Á síðuni Gisting finnur tú upplýsingar um ymisk sløg av gisting í Suðuroynni, t.d. summarhús, hotel, gistingarhús, skótahús, kamping og annað.